cig servizos

A CIG-Servizos reclama un acordo entre a Autoridade Portuaria e o Náutico de Vigo que garanta o emprego

Os delegados/as sindicais da CIG trasladaron a preocupación do persoal ante as negociacións do canon polo uso da lámina de auga
04/6/13.
Os delegados/as da CIG no Real Club Náutico de Vigo trasladaron a preocupación do cadro de persoal ante as negociacións abertas entre a directiva da entidade e a Autoridade Portuaria para rebaixar o canon polo uso da lámina de auga. Dende a federación de Servizos da central nacionalista reclaman un acordo que permita manter a totalidade do emprego.

Protesta en Mariel Boutiques de Vigo para reclamar a indemnización a unha traballadora despedida

O propietario da cadea de tendas rescindiulle o contrato tras a denuncia pola modificación substancial das condicións laborais
08/5/13.
Delegados/as da CIG-Servizos desenvolveron hoxe unha protesta diante dunha das tendas de Mariel Boutiques en Vigo para reclamar o pago dos salarios e da indemnización que o propietario lle adebeda a unha traballadora que despediu despois de que denunciase a modificación substancial das condicións laborais. Os problemas da empregada, que se atopaba de baixa por acoso laboral cando foi despedida, comezaron cando solicita a redución de xornada para o coidado dunha filla.

Inícianse as protestas en empresas de limpeza para desbloquear o convenio provincial de Pontevedra

A primeira das mobilizacións -que terán continuidade nos vindeiros días- desenvolveuse na compañía viguesa ISS
24/4/13.
A CIG-Servizos iniciou hoxe en Vigo unha serie de mobilizacións para reclamar o desbloqueo do convenio provincial de limpeza, que decaerá no mes de xullo no caso de que antes non se chegue a un acordo que permita a súa renovación. A primeira das protestas consistiu na ocupación temporal e nunha posterior concentración ás portas da compañía ISS.

O publicado por un dixital sobre Pórtico non se corresponde co expresado pola CIG Servizos

Dende o sindicato anuncian que a partir de agora “todo o que manifestemos sobre a empresa será remitido por escrito"
18/4/13.
A CIG quere deixar claro que as informacións sobre a situación económica da empresa Pórtico publicadas hoxe por un xornal dixital non se corresponden co manifestado nin dende a federación de Servizos nin por parte dos delegados/as da central na compañía.

A alimentación pontevedresa irá á folga o luns pola negativa da patronal a retirar a proposta de convenio

Arredor de 15.000 traballadores/as do sector están chamados ao paro en toda a provincia durante a Semana Santa
22/3/13.
Os traballadores/as do comercio de alimentación da provincia de Pontevedra irán finalmente á folga a partir do luns tras a ruptura das negociacións coa patronal do sector, que pretende asinar un convenio que suporía a perda de boa parte dos seus dereitos laborais. As tres centrais maioritarias convocan os afectados/as a unha asemblea este domingo ás 11.30 horas no local da CIG de Vigo para preparar as mobilizacións.

Delegados/as da CIG-Servizos boicotean negociación do convenio estatal de Seguridade Privada

Denuncian que os sindicatos españois e a patronal "teñen todo acordado en conversas privadas"
12/3/13.
Un grupo de delegados e delegadas da CIG-Servizos boicotearon hoxe en Madrid a mesa de negociación do convenio estatal da Seguridade Privada para denunciar que os sindicatos españois están a manter xuntanzas privadas coa patronal. A Policía española identificou a varios dos participantes, entre eles o secretario nacional da federación, a pesar de que non se rexistraron incidentes.

CIG, CCOO e UGT rexeitan o convenio de Grandes Almacéns con protestas ante as centrais asinantes

Dende a federación de Servizos adiántase a posibilidade de impugnar o acordo entre a patronal e os sindicatos Fasga e Fetico
06/3/13.
As centrais CIG, CCOO e UGT, presentes na mesa de negociación do convenio de Grandes Almacéns, rexeitaron onte o acordo asinado entre a patronal e os sindicatos Fetico e Fesga con protestas diante da sede das organizacións asinantes e de El Corte Inglés en Vigo. Dende a federación de Servizos da central nacionalista adiantan a posibilidade de impugnar o acordo porque modifica a situación contractual de centos de traballadores/as.

Solicitada unha reunión con Medio Ambiente da Coruña para abordar os verquidos de Nostián

25/1/13.
O Comité de Albada trasladouse esta mañá até as dependencias que o departamento de medio ambiente do Concello da Coruña ten na Casa da Auga para solicitar por escrito unha reunión co responsábel municipal desta área.

O Xulgado do Social declara improcedente o despido dun membro da CIG na Fundación Valdegodos

A sentenza chega tras outras decisións xudicias que recoñeceron as horas extra ou a antigüidade dos empregados/as
24/1/13.
O Xulgado do Social número 3 de Ourense vén de declarar improcedente o despedimento dun membro da sección sindical da CIG da Fundación Valdegodos do Barco de Valdeorras. A sentenza, contra a que cabe recurso no TSXG, chega tras outras decisións xudiciais que obrigaron á empresa a abonar as horas extra e recoñecer a antigüidade do persoal. Dende a central nacionalista denuncian que a dirección da compañía pretende que todos os afiliados/as da CIG abandonen a empresa e anuncian que estudan presentar unha demanda por persecución sindical.

A CIG-Servizos reclama cunha protesta diante do Marco o mantemento do emprego no museo vigués

Dende a federación denuncian que a pugna política entre Deputación (PP) e Concello (PSOE) aboca a infraestrutura ao peche
15/1/13.
Un grupo de traballadores/as do museo Marco de Vigo e de delegados/as da CIG levaron a cabo unha concentración de protesta ás portas do edificio para reclamar o mantemento do emprego no centro. Dende a federación de Servizos da central nacionalista denuncian que o enfrontamento político entre a Deputación (PP) e o Concello (PSOE) pon en perigo a supervivencia dunha das infraestruturas culturais de referencia na cidade.

Distribuir contido