Cleanet Empresarial

A CIG obtén dúas delegadas en Cleanet Empresarial Ferrol e convértese na central máis votada

Cómpre destacar que, até o de agora, a organización nacionalista non tiña representación neste centro de traballo
24/3/15.
A CIG vén de converterse na primeira forza en votos na empresa Cleanet Empresarial (encargada dos servizos de limpeza das instalacións militares de Ferrol) logo das eleccións sindicais celebradas este mesmo martes. Cómpre destacar que, até o de agora, a organización nacionalista non tiña representación neste centro de traballo.

A CIG denuncia presións ás traballadoras/es de Cleanet en Pontevedra por parte de mandos militares

A central baralla mobilizarse e denunciar ante a Inspección de Traballo estas actitudes
11/2/15.
A CIG-Servizos de Pontevedra anunciou hoxe que non tolerará máis presións de mandos militares ás traballadoras/es de Cleanet, empresa concesionaria da limpeza dos recintos de Defensa e que vén de presentar concurso de acredores, e baralla convocar mobilizacións e denunnciar estas actitudes na Inspección de Traballo. “Como agora xa non hai empresa os militares diríxense a elas directamente, algo que non imos permitir; se queren darlles ordes que rescaten o servizo, como propoñemos dende a CIG”, indican dende a federación.

As traballadoras de Cleanet Ferrol continuarán en folga por “dignidade” até o 8 de marzo

Ao día seguinte incorporaranse aos seus postos, tras 132 días de paro, e logo de coñecer que a empresa está en concurso
10/2/15.
Baixo a premisa de que “a dignidade non se merca, senón que se demostra”, as máis de 50 traballadoras de Cleanet Empresarial en Ferrol acordaron continuar coa folga iniciada o pasado 27 de outubro, logo de coñeceren que a empresa vén de entrar en concurso de acredores. A folga estenderase até o vindeiro 8 de marzo, data especialmente simbólica para unha loita como a que este grupo de mulleres vén desenvolvendo dende hai meses.

As traballadoras de Cleanet levan o seu conflito laboral até Bruxelas

Explicaron aos/ás eurodeputados/as a súa situación laboral logo de levar máis de tres meses en folga indefinida
05/2/15.
O conflito que se está a vivir en Cleanet Empresarial chegou esta semana a Bruxelas, a onde un grupo de traballadoras, acompañadas por membros da CIG-Sevizos de Ferrol, acudiron para informar da problemática laboral que veñen arrastrando dende hai meses por mor dos atrasos no cobro dos salarios, que remataron converténdose en impagos, e que as levou á convocatoria de folga indefinida dende o 27 de outubro.

As traballadoras de Cleanet Ferrol cumpren este sábado dous meses en folga

O persoal continúa co paro indefinido pero acordou suspender temporalmente a acampada para poder pasar o nadal coas súas familia
23/12/14.
As traballadoras de Cleanet –empresa que ten a concesión dos servizos de limpeza das instalacións de Defensa- cumprirán o vindeiro sábado, 27 de decembro, dous meses en folga indefinida en demanda do cobro dos seus salarios. O persoal que, ao tempo do paro, está desenvolvendo unha acampada no Cantón de Molíns, a carón do Arsenal Militar, critica que neste tempo nin a empresa, nin o Ministerio, fosen quen de achegar unha solución ao problema dos impagos.

“Cleanet non paga, Defensa non dá a cara”

Traballadoras da empresa que realiza a limpeza das instalacións de Defensa manifestáronse polas rúas de Ferrol
11/12/14.
As traballadores e os traballadores de Cleanet manifestáronse na tarde deste mércores polas rúas de Ferrol para esixir o cobro inmediato dos seus salarios, xa que a última mensualidade que percibiron foi a de agosto. A mobilización contou coa presenza de traballadoras de Cleanet de Pontevedra –que tamén sofren os problemas de impago- e de veciños/as e familiares que quixeron amosar deste xeito a súa solidariedade coa lexítima loita deste persoal, en folga dende o pasado 27 de outubro.

Traballadoras de Cleanet de todo o país manifestaranse este mércores en Ferrol

O persoal en folga continúa coa acampada diante do Arsenal Militar
09/12/14.
As traballadoras de Cleanet continúan coa acampada iniciada a pasada semana no parque do Cantón de Ferrol, diante da porta do Dique do Arsenal, para esixir o cobro inmediato dos seus salarios. Dende a CIG-Servizos Ferrol chaman a solidarizarse coa loita destas traballadoras e participar na manifestación convocada este mércores, día 10, ás 20:00, dende a Praza de España e con remate na acampada.

As traballadoras de Cleanet inician unha acampada indefinida diante do Arsenal Militar

O persoal, que leva máis dun mes en folga, reclama unha solución inmediata á súa insostíbel situación
04/12/14.
As traballadoras de Cleanet Empresarial, empresa responsábel da limpeza das instalacións militares de Ferrol, veñen de iniciar acampada indefinida no parque do Cantón de Ferrol (diante da porta do Dique do Arsenal) para esixir unha solución definitiva ao problema de impagos que sofren dende que a empresa accedeu á contrata do servizo.

O persoal de Cleanet en Pontevedra para durante unha hora e protesta diante da Brilat e a Escola Naval

As traballadoras/es da limpeza das instalacións militares reclaman o cobro inmediato dos salarios pendentes
27/11/14.
O persoal de Cleanet en Pontevedra secundou na súa práctica totalidade -coa única excepción dunha traballadora- o paro dunha hora convocado no servizo de limpeza das instalacións militares da comarca de Pontevedra para reclamar que se lles abonen os salarios pendentes. As afectadas/os aproveitaron para realizar unha concentración de protesta ás portas da Brilat en Figueirido e da Escola Naval en Marín.

Merenda reivindicativa no Museo Militar de Ferrol en demanda do cobro dos salarios

As traballadoras de Cleanet proseguen co calendario de mobilizacións diarias
26/11/14.
As traballadoras e traballadores de Cleanet continúan a se mobilizar en demanda cobro dos seus salarios, desta volta cunha improvisada merenda diante nas instalacións do Museo Militar de Ferrol. A protesta prodúcese cando están a punto de cumprir un mes en folga e sen que se producisen avances firmes por parte da empresa que garantan o abono do total das contías pendentes.

Distribuir contido