eleccións sindicais

CIG-Servizos consegue maioría absoluta de votos no almacén de Piadela, do Grupo Gadisa

15/7/11.

CIG-Servizos revalidou a maioría absoluta dos votos (50´78%) no colexio de especialistas do almacén de distribución do Grupo Gadisa, situado en Piadela (Betanzos), nas eleccións celebradas o 14 de xullo. Malia que esta foi a primeira vez en que concorreron catro candidaturas, a da CIG-Servizos conseguiu atraer máis apoios có resto das outras tres xuntas.

O sindicato pasa de unha a cinco delegadas e obtén a maioría absoluta en Cortefiel da Coruña

Contra os despedimentos en Cortefiel 2 (20090717)

11/7/11.

CIG-Servizos alzouse coa maioría absoluta nas eleccións ao comité provincial coruñés do Grupo Cortefiel tras conseguir cinco delegadas de nove. A cadea que agrupa as tendas de moda CORTEFIEL, SPRINGFIELD, WOMEN’SECRET e FIFTY FACTORY conta con máis de 100 traballadores e traballadoras distribuídas na Coruña, Santiago de Compostela, Ferrol e Culleredo. Hai catro anos a central nacionalista tan só contaba cunha representante.

A central gaña nas tendas de Gadis da provincia da Coruña

Escrutinio das eleccións de Gadis no almacén de Piadela (30-06-2011)

02/7/11.

CIG-Servizos conseguiu un resultado espectacular nas eleccións ao comité provincial das tendas de Gadis na Coruña ao obter máis do 40% de apoio, que se traduce en 600 votos e 9 delegados. E todo malia as presións habituais e dos intentos da dirección por prexudicar o sindicato nacionalista a través da influencia dos encargados no voto, da contratación a última hora para inflar o censo, de se celebraren as eleccións en período de vacacións ou da difusión de mensaxes apocalípticas no caso de que gañase CIG-Servizos. Máis de 2.000 traballadores e traballadoras estiveron chamadas ás urnas en 90 centros espallados por toda a provincia coruñesa.

CIG-Servizos vence en Serunión nas eleccións ao comité provincial coruñés

30/6/11.

CIG-Servizos acadou maioría absoluta ao conseguir 7 dos 13 delegados do comité de empresa de Serunión na provincia da Coruña. O órgano de representación do persoal, que é de nova creación, tamén contará coa presenza de UGT, que obtivo os seis delegados restantes. A Federación congratúlase por estes resultados excelentes e agradece a confianza depositada na súa lista.

A Federación consolida a maioría absoluta entre o persoal de xardinaría do Concello de Vigo

28/6/11.

CIG-Servizos conseguiu seis delegados, un máis que hai catro anos, nas eleccións de Cespa no centro de traballo do servizo de conservación das zonas verdes do Concello de Vigo. UGT, con tres representantes, é a outra central presente no comité. Nas votacións, que se desenvolveron o 27 de xuño, participou máis do 98% do persoal con dereito a sufraxio.

A central consegue representación nos Gadis pontevedreses a primeira vez que pode participar

16/6/11.

CIG-Servizos conseguiu uns resultados meritorios nas eleccións ao comité de empresa dos Gadis da provincia pontevedresa, celebradas o 15 de xuño. A central obtivo dúas delegadas na primeira ocasión en que puido manter a candidatura até a conclusión do proceso. Tanto neste como en anteriores comicios, a empresa, CC.OO e USO perseguiron e acosaron as integrantes da lista da CIG-Servizos co propósito de que renunciasen. Mais desta volta non conseguiron dobregar a súa vontade e o sindicato nacionalista estará presente no órgano de representación do persoal.

Yudigar despide unha delegada da CIG-Servizos en pleno proceso electoral

10/6/11.

Yudigar despediu unha delegada e candidata da CIG-Servizos despois de que o sindicato preavisase as eleccións. Esta empresa dedicada á venda de mobiliario e equipamento comercial pretende enmascarar esta represalia alegando causas económicas e ofrecendo unha indemnización de 20 días por ano traballado. CIG-Servizos organiza, o 13 de xuño na Coruña, unha concentración de apoio á compañeira que se desenvolverá a partir das 11:00 horas ás portas do SMAC, onde a esa hora dará comezo o acto de conciliación. A central nacionalista demandará a compañía solicitando a nulidade do despedimento.

A central segue a ser hexemónica nos tres comités máis representativos do Grupo Froiz en Pontevedra

31/5/11.

CIG-Servizos vén de revalidar as maiorías que xa tiña nos tres comités de empresa máis representativos do Grupo Froiz na provincia de Pontevedra nas eleccións celebradas os días 20, 24 e 26 de maio en “Froiz S.A.”, “Prieto Froiz S.A.” e “Distribuciones Froiz S.A.”. Na primeira empresa acadáronse oito delegados dos 13 posíbeis; catro na segunda, mentres que na terceira se conseguiron nove representantes.

Gadis despide traballadores por integrar a lista da CIG-Servizos

26/5/11.

Cada vez que se aproximan unhas eleccións sindicais Gadis emprega todos os seus esforzos en pór todo tipo de obstáculos á CIG-Servizos para que non poida presentar candidatura ou, no seu defecto, diminúa a súa representación. Actualmente vén de despedir dous traballadores do almacén de Piadela que manifestaron a súa intención de participar na lista do sindicato. Gadis tamén paralizou no último momento a contratación dunha empregada por ser irmá dunha integrante do comité.

O sindicato aumenta considerabelmente as delegadas no comité pontevedrés de Zara

15/4/11.

A Federación de Servizos da CIG pasou de ter dúas a cinco delegadas no comité de Zara da provincia de Pontevedra logo dos resultados acadados nas eleccións celebradas o 14 de abril. A central nacionalista convértese na segunda máis votada, a tan só sete papeletas de CC.OO, na segunda ocasión en que presenta candidatura.