FETICO

CIG-Servizos de Lugo mobilízase contra os despedimentos en Supermercados DIA

Concentración en Supermecados DIA en Lugo 20101125

26/11/10.

Sindicalistas da CIG-Servizos de Lugo concentráronse o 25 de novembro diante do supermercado DIA da Avenida da Coruña en protesta pola ducia de despedimentos en estabelecementos da cadea na cidade. A Federación comarcal tamén lle reprocha a FETICO, que ostenta toda a representación no comité provincial, a súa complicidade e silencio coas represalias da empresa.

CC.OO, UGT e FETICO asinan un preacordo no comercio de alimentación pontevedrés

Folga no Comercio de Alimentación en Vigo 7

03/12/09.

As centrais CC.OO, UGT e FETICO asinaron un preacordo no convenio do comercio de alimentación da provincia de Pontevedra nunha mediación do AGA que se estendeu desde as 16:00 horas do 2 de decembro até as 02:00 horas do día posterior. CIG-Servizos non rubricou o texto ao estar en desacordo coa vixencia (tres anos) e co incremento retributivo, entre outras cuestións. O persoal está convocado a asembleas, o 4 de decembro ás 22:00 horas nos locais da CIG en Vigo e Pontevedra, para someter a votación o preacordo.

FASGA e FETICO asinan a modificación de horarios en El Corte Inglés

30/9/09.

Os sindicatos FASGA e FETICO asinaron coa empresa a modificación dos horarios en El Corte Inglés. CIG-Servizos non se resigna e segue coa súa campaña de denuncia desta medida antiobreira adoptada pola empresa e avalada polas centrais amarelas nunha reunión do comité intercentros.

O sindicato nacionalista informará do acontecido o persoal doutras empresas afectadas polo convenio de Grandes Almacéns (Alcampo, Carrefour e Leroy Merlin) en previsión de que nelas tamén se modifiquen os horarios.

Iníciase unha campaña contra a modificación dos horarios en El Corte Inglés

24/9/09.

CIG-Servizos iniciou unha campaña informativa entre as traballadoras e traballadores de “El Corte Inglés” para advertilos da posibilidade, máis que probábel, de que a empresa lles modifique os horarios coa plena conivencia de FETICO e FASGA, responsábeis da sinatura do convenio de Grandes Almacéns, recentemente rubricado e que supón unha clara regresión nas condicións salariais e sociais do persoal.

O convenio de Grandes Almacéns hipoteca até 2012 o poder adquisitivo do persoal

12/8/09.

CIG-Servizos fai unha valoración negativa do convenio de Grandes Almacéns, rubricado o pasado 5 de agosto entre a patronal ANGED e os sindicatos amarelos FETICO e FASGA no máis absoluto escurantismo e coa exclusión da central nacionalista da mesa negociadora.

Asinado o Convenio de Grandes Almacéns coa exclusión da CIG da mesa negociadora

07/8/09.

Confirmáronse os peores augurios. O convenio de Grandes Almacéns foi asinado o 5 de agosto en Madrid entre os sindicatos FASGA e FETICO e mais a patronal ANGED. A CIG-Servizos non puido acudir á cita dado que foi comunicada tarde de xeito completamente intencionado.

A Federación de Servizos da CIG decatouse da sinatura do convenio a través duns panfletos da autoría dos sindicatos FASGA e FETICO, redactados ambos nun ton eufórico e vitorioso. Do que se desprende deses panfletos é que a vixencia do convenio vai ser de catro anos (2009, 2010, 2011 e 2012).

As negociacións do Convenio de Grandes Almacéns desenvólvense no máis absoluto escurantismo

05/8/09.

A patronal do sector dos Grandes Almacéns e as centrais FETICO, FASGA, CC.OO e UGT están a desenvolver no máis absoluto escurantismo as negociacións do convenio, de ámbito estatal. A CIG e o sindicato vasco LAB non foron avisadas para participar nas últimas xuntanzas, malia teren pleno dereito tendo en conta a súa representatividade no sector.

As eleccións repetiranse en DIA e FETICO pide a anulación das candidaturas disidentes

09/7/09.

As eleccións hanse repetir en Supermercados DIA da provincia da Coruña logo de que a CIG impugnase o proceso polas irregularidades detectadas no voto por correo. FETICO tamén impugnou mais por motivos ben diferentes. O sindicato empresarial pide a anulación das candidaturas disidentes.

As votacións ao comité de empresa provincial hanse repetir como consecuencia do ditame dun laudo arbitral. Nas eleccións celebradas o pasado 23 de xuño constatouse que FETICO non conta co apoio da maioría das traballadoras.