horarios

A folga contra a ampliación dos horarios en Catro Camiños pecha máis do 90% das tendas

29/12/11.

Máis do 90% dos estabelecementos do centro comercial Catro Camiños, na Coruña, pechou na folga do 28 de decembro contra a ampliación do horario de apertura até as 22:00 horas. Agás C&A, todas as tendas do Grupo Inditex, Cortefiel e unha parte importante do pequeno comercio secundaron o paro desenvolvido entre as 21:00 e 22:00 horas. A folga será indefinida a partir do 9 de xaneiro no caso de que a dirección do centro e as multinacionais non desistan dos seus propósitos.

Persoal do centro comercial Catro Camiños mobilízase contra a ampliación dos horarios

20/12/11.

Traballadores e traballadoras do centro comercial Catro Camiños, na Coruña, concentráronse diante da porta principal, a primeira hora do 20 de decembro, para amosar a súa repulsa perante os plans das grandes empresas asentadas nesta superficie de ampliar o horario de apertura até as 22:00 horas. A convocatoria da protesta partiu da CIG-Servizos, UGT e CC.OO.

A Xunta recúa e os comercios non abrirán máis festivos dos estabelecidos por lei

23/4/10.

O Goberno autonómico deu marcha atrás na súa intención de aprobar un decreto que autorizase a apertura dos comercios máis domingos e festivos dos oito estabelecidos pola lei. A presión dos sindicatos, que anunciaran mobilizacións, a convocatoria de folga e a interposición dunha demanda, serviu para que a Xunta recuase.

Informe xurídico da CIG confirma a ilegalidade do decreto dos horarios comerciais

16/4/10.

A Asesoría Xurídica da CIG realizou un informe que pon de manifesto a ilegalidade que cometerá a Xunta se finalmente plasma nun decreto o borrador remitido aos sindicatos que autoriza máis días de apertura dos comercios en domingos e festivos. O Goberno autonómico quebranta o imperativo legal de que sexan os concellos quen determinen que os seus municipios sexan declarados áreas de grande afluencia turística e substitúe a iniciativa local por un informe da Federación Galega de Municipios e Provincias.

A Xunta quere ampliar ilegalmente os días de apertura dos comercios en domingos e festivos

13/4/10.

A Xunta remitiu aos sindicatos un borrador de decreto para ampliar no que resta de ano en catro días, no caso da cidade de Compostela, e en dous nos demais concellos do país, o límite legal de oito xornadas anuais en que os comercios están autorizados a abrir en domingos e festivos. De aprobarse, o decreto será manifestamente ilegal por vulnerar, entre outras normas, o artigo 9.1 da Lei 13/2006 de Horarios Comerciais de Galiza. O Goberno autonómico actúa ao ditado dos intereses da asociación empresarial ANGED, a grande patronal da distribución, tal como recoñece no escrito enviado ás centrais sindicais.

Os comités dos Alcampo de Vigo proseguen coas mobilizacións contra o cambio de horarios

09/1/10.

Continúan as concentracións do persoal dos Alcampo de Vigo contra a intención da empresa de modificar os horarios de maneira unilateral. Traballadores e traballadoras, apoiados pola CIG-Servizos, mobilizáronse o 7 de xaneiro ás portas dos estabelecementos que a multinacional francesa posúe en Coia e na avenida de Madrid.

Os empregados dos Alcampo vigueses mobilizaranse contra o cambio de horarios

16/12/09.

A asemblea de traballadores/as dos Alcampo de Vigo decidiu presentar un conflito colectivo e mobilizarse contra a modificación dos horarios imposta pola multinacional francesa de grandes almacéns. As primeiras concentracións celebraranse os días 19 e 23 de decembro.

FASGA e FETICO asinan a modificación de horarios en El Corte Inglés

30/9/09.

Os sindicatos FASGA e FETICO asinaron coa empresa a modificación dos horarios en El Corte Inglés. CIG-Servizos non se resigna e segue coa súa campaña de denuncia desta medida antiobreira adoptada pola empresa e avalada polas centrais amarelas nunha reunión do comité intercentros.

O sindicato nacionalista informará do acontecido o persoal doutras empresas afectadas polo convenio de Grandes Almacéns (Alcampo, Carrefour e Leroy Merlin) en previsión de que nelas tamén se modifiquen os horarios.

Iníciase unha campaña contra a modificación dos horarios en El Corte Inglés

24/9/09.

CIG-Servizos iniciou unha campaña informativa entre as traballadoras e traballadores de “El Corte Inglés” para advertilos da posibilidade, máis que probábel, de que a empresa lles modifique os horarios coa plena conivencia de FETICO e FASGA, responsábeis da sinatura do convenio de Grandes Almacéns, recentemente rubricado e que supón unha clara regresión nas condicións salariais e sociais do persoal.