mobilizacións

Un cento de vixilantes de seguridade privada de toda Galiza tomou parte na concentración convocada pola CIG-Servizos o 20 de xullo en coincidencia coa apertura do estabelecemento de IKEA na Coruña. A protesta serviu para visualizar ante a cidadanía o rexeitamento do sector ante a parálise da negociación do convenio, estancada por mor da inflexibilidade da patronal.

Traballadores e traballadoras da Asociación DYA e de Serviasistencia, empresas concesionarias do servizo de axuda a domicilio do Concello de Ferrol, iniciaron mobilizacións o 10 de xuño na defensa dos seus postos e para demandar información sobre que compañías van ser as novas adxudicatarias.

Traballadores e delegados das residencias privadas da terceira idade proseguen coas mobilizacións a prol da consecución dun convenio xusto e contra a represión sindical exercida nos últimos tempos, que xa se saldou con dous delegados despedidos en Cabanas e en Vilanova de Arousa. Nesta vila celebrouse unha concentración o 11 de maio diante do xeriátrico Valle Inclán, a segunda que se realiza neste centro nos últimos seis meses.

Varios empregados de Francisco Parada aos que a empresa lles adebeda mensualidades iniciaron o 5 de maio en Sarria unha peregrinación a pé até Compostela, a onde confían chegar catro días máis tarde. Mentres, o propietario da compañía querelouse contra o asesor sindical da CIG por “calumnias e inxurias” por chamalo moroso, cualificativo que resulta obvio ao teor das débedas cuantiosas que o patrón ten contraídas con asalariados seus.