SEAGA

A CIG presidirá todos os comités de SEAGA despois da vitoria en Pontevedra

As votacións tiveron lugar en plena campaña de incendios por mor das demoras causadas por recursos de CCOO e UGT
30/7/14.
O persoal de SEAGA na provincia de Pontevedra outorgou a maioría absoluta á CIG nas eleccións sindicais que tiveron lugar este 29 de xullo, logrando 5 delegados dun comité de 9. A central nacionalista dirixirá, deste xeito, os catro comités da empresa pública de loita contra os lumes forestais, centrando os seus esforzos en lograr un convenio colectivo e en aumentar o período laboral, hoxe de tan só 3 meses ao ano.

Traballadores/as de Seaga exixen solucións á precariedade que sofren polas políticas da Xunta

Percorreron en manifestación as rúas de Compostela flanqueados por furgóns policiais
16/5/14.
Traballadores e traballadoras de Seaga percorreron as rúas de Compostela convocados pola CIG-Servizos e os comités provinciais da empresa pública en medio dunha desproporcionada presenza policial. As/os manifestantes corearon numerosas consignas en demanda da dimisión da conselleira de Medio Rural, Rosa Quintana e do Secretario Xeral de Montes, Tomás Fernández Couto e outras como “Quen apaga os lumes? Nós e non a UME”, “O monte ardendo e nós no paro” ou “Seis meses de traballo, é unha solución”.

Persoal de Seaga anuncia novas mobilizacións en demanda de estabilidade laboral e condicións dignas

Denuncian que non poden acceder ao subsidio por desemprego e ás prestacións porque só están contratados/as tres meses ao ano
07/5/14.
Representantes das traballadoras e traballadores de Seaga compareceron este mércores en rolda de prensa para anunciar o inicio dun novo calendario de mobilizacións en demanda de estabilidade laboral e unhas condicións dignas. O colectivo denuncia que os seus contratos son tan precarios que nin sequera teñen dereito a cobrar o paro nin poden acceder á outro tipo de prestacións e axudas, véndose abocados a verdadeiras situacións de exclusión social. Por iso, e ante a falta de solucións por parte da Consellaría do Medio Rural, o 16 de maio teñen convocada unha manifestación dende a estación de tren de Compostela até San Caetano e unha asemblea na Praza da Quintana.

Os comités de Seaga denuncian que, por vez primeira, se priorizaron os labores de limpeza e non a extinción

En período de alto risco e para poder xustificar as subvencións que a Unión Europea concede para prevención
25/9/13.
Os comités de Seaga compareceron esta mañá en rolda de prensa para explicar as anomalías que se deron durante a campaña de alto risco. Anomalías como a de priorizar, en plena campaña de alto risco, os labores de limpeza fronte os de extinción, para poder xustificar as subvencións que a Unión Europea tiña concedido para este fin. Os comités fixeron un chamamento a participar na manifestación do día 29 de setembro para exixir un cambio radical nas políticas forestais.

Persoal de Seaga marcha a pé de Ferrol á base do Ponto para denunciar o recorte nas contratacións

CIG-Servizos e os traballadores/as advirten que este ano o dispositivo para Ferrol-Eume-Ortegal só contará con 20 persoas
26/6/12.
O persoal de Seaga do Distrito 1 marchou na mañá do luns dende os edificios da Xunta en Ferrol até a base que a empresa ten no Ponto para denunciar o recorte nas contratacións do dispositivo contra os lumes e a progresiva privatización do servizo. Na marcha, convocada pola CIG-Servizos, alertouse de que para este ano as contratacións no distrito 1 pasaron de estar integradas por 75 persoas a contar con tan só 20 brigadistas.

Persoal de Seaga maniféstase en Compostela para denunciar a redución das contratacións na empresa

A CIG-Servizos “desvincúlase completamente” dos incidente ocorridos en San Caetano, cando o acto xa estaba rematado
20/6/12.
Persoal de Seaga saíu este mércores á rúa, convocado pola CIG-Servizos e polos comités provinciais, para denunciar a redución das contratacións na empresa pública, co único obxectivo de evitar recoñecer a condición de fixos discontinuos dos traballadores e traballadoras que entren a desenvolver a súa actividade nesta empresa pública. O secretario nacional de CIG-Servizos, Paulo Rubido, denunciou ademais que tanto a administración como Natutecnia convocaron as probas para acceder a un posto de brigadista, casualmente o mesmo día da mobilización, o que non impediu que os que se examinaron en Compostela se sumaran cando xa comezara a marcha.

Traballadores de SEAGA rozan a maleza no perímetro da casa de Feijoo

20120307_monte_pio_seaga_roce_maleza.jpg
07/3/12.
Traballadores de SEAGA realizaron labores de limpeza e roce da maleza no perímetro da residencia oficial do presidente da Xunta. Denunciaron deste xeito a súa situación laboral e reclamaron o inicio inmediato de negociacións. O persoal de SEAGA evidenciou como se incumpre a Lei de Montes no contorno da vivenda de Núñez Feijoo, pois é obrigatorio manter limpo un perímetro de 50 metros arredor dos núcleos habitados.

Empregados de SEAGA péchanse indefinidamente nunha base en Silleda

20120305_peche_base_helitransportada_Silleda
06/3/12.
Traballadoras e traballadores de SEAGA comezaron o 5 de marzo un peche de carácter indefinido na base helitransportada de Silleda para denunciar a manipulación dos datos sobre o operativo contra os lumes, pois só están a funcionar tres bases no canto de nove. Nesta precampaña, a Xunta non contratou ningunha persoa a través de SEAGA, unha decisión que o persoal entende que é política e que pretende evitar as demandas contra a Administración autonómica por cesión ilegal de man de obra.

O persoal de SEAGA retomará as mobilizacións

Asemblea e manifestación de SEAGA 6
09/2/12.
O persoal de SEAGA retomará as mobilizacións para regularizar a súa situación e para esixir o inicio da precampaña do operativo contra os lumes. Os empregados emprenderán diferentes actos de protesta como peches en bases e en delegacións da Xunta, marchas a pé ou campañas informativas. No plano legal, xa se ditaron 70 sentenzas que recoñecen o carácter fixo-descontinuo destes traballadores e aínda quedan por celebrar uns cen xuízos.

O Supremo abre a porta a que o persoal de SEAGA pase a formar parte do PLADIGA

Asemblea e manifestación de SEAGA 8
14/12/11.
Varias sentenzas do Tribunal Supremo recoñecen que a contratación en SEAGA é fraudulenta por apostar pola modalidade de obra e servizo no canto de que os traballadores sexan fixos-descontinuos. Ademais, o Alto Tribunal español ofrece a posibilidade de que os 2.000 empregados de SEAGA reclamen por cesión ilegal para pasar a formar parte do PLADIGA (Plan de Prevención e Defensa contra os Incendios Forestais de Galicia), que está conformado por persoal laboral da Xunta.

Distribuir contido