comercio vario

A Xunta remitiu aos sindicatos un borrador de decreto para ampliar no que resta de ano en catro días, no caso da cidade de Compostela, e en dous nos demais concellos do país, o límite legal de oito xornadas anuais en que os comercios están autorizados a abrir en domingos e festivos. De aprobarse, o decreto será manifestamente ilegal por vulnerar, entre outras normas, o artigo 9.1 da Lei 13/2006 de Horarios Comerciais de Galiza. O Goberno autonómico actúa ao ditado dos intereses da asociación empresarial ANGED, a grande patronal da distribución, tal como recoñece no escrito enviado ás centrais sindicais.

Francisco Parada, propietario dos estabelecementos homónimos, segue sen pagar os salarios a traballadores da súa empresa. A resposta da CIG-Servizos prosegue con contundencia e o 23 de marzo houbo unha nova concentración fronte á tenda da rúa Fernando Macías da Coruña. Existen casos de empregados que levan máis de sete meses sen percibir o soldo.

A Sala do Social do Tribunal Superior de Xustiza de Galiza condenou Zara España S.A. por vulnerar o dereito á liberdade sindical da CIG-Servizos. Esta firma do grupo Inditex deberá indemnizar a central con 1.264´78 euros polo prexuízo moral ocasionado. Zara negáralles permisos retribuídos a dúas traballadoras que designara o sindicato para acudir a xuntanzas da negociación do convenio provincial do comercio téxtil ourensán.

Varias ducias de delegados da CIG-Servizos concentráronse o 11 de decembro fronte ao estabelecemento compostelán da multinacional francesa de roupa feminina Pimkie en protesta polo despedimento dunha traballadora e para censurar o acoso laboral inflixido pola encargada a empregadas.