limpeza

CIG-Servizos obtén maioría absoluta no comité coruñés de Pilsa

14/5/10.

CIG-Servizos prosegue aumentando a súa representación nas eleccións de persoal como se demostrou nas votacións ao comité provincial coruñés de Pilsa, empresa de limpeza, onde conseguiu 8 delegados, fronte aos 3 obtidos pola UGT e aos 2 acadados por CC.OO.

Despedidas da limpeza do CPI de Panxón protestan na Consellaría de Educación

23/4/10.

Varias ducias de sindicalistas da CIG-Servizos procedentes de Vigo, traballadores e as seis persoas despedidas do servizo de limpeza do CPI de Panxón concentráronse durante máis dunha hora na sede da Consellaría de Educación, en San Caetano, na mañá do 23 de abril. O sindicato esixe a implicación da Xunta para que procure unha solución a estes despedimentos. Porén, a Administración autonómica inhíbese de maneira irresponsábel.

Seis operarios da limpeza do CPI de Panxón perderán os seus postos a partir de abril

23/3/10.

Seis traballadores e traballadoras da empresa Limpiezas Germania que prestan os seus servizos no CPI de Panxón perderán os seus postos a partir do primeiro de abril. A Consellaría de Educación decidiu que o persoal laboral do centro (camareiros-limpadores) asuma as funcións que realizan os operarios da concesionaria.

Readmitidas as 12 traballadoras da limpeza do Alcampo de Coia

22/3/10.

As 12 traballadoras da limpeza do Alcampo de Coia (Vigo) que foran despedidas reincorporáronse o 22 de marzo aos seus postos logo de que a multinacional francesa recapacitase e optase por cambiar de contrata do servizo e esta aceptase subrogar as empregadas. CIG-Servizos felicítase por este desenlace satisfactorio ao conseguírense a readmisión das compañeiras e o cumprimento do convenio.

Persoal da limpeza de todo o país solidarízase coas despedidas nun Alcampo de Vigo

05/3/10.

Concentracións simultáneas ás portas dos Alcampo de Coia (Vigo), A Coruña, Ferrol e Compostela mostraron, o 4 de marzo, a solidariedade coas 12 traballadoras da limpeza despedidas recentemente na cidade olívica ao non seren subrogadas á nova contrata do servizo.

Trescentos delegados protestan contra os despedimentos na limpeza dun Alcampo vigués

11/2/10.

Delegados de CIG-Servizos e doutros sindicatos concentráronse o 10 de febreiro ás portas do Alcampo de Coia (Vigo) como mostra de rexeitamento contra o despedimento de 12 traballadoras da limpeza que non foron subrogadas á empresa que recentemente se fixo cargo do servizo, “Amil Lago Servicios Generales S.L.”. A protesta estivo controlada de preto por un amplo dispositivo policial, que os sindicatos non dubidaron en cualificar de abusivo e coercitivo.

Convocada unha nova folga en Limpezas Ames por mor do impagamento de salarios

07/2/10.

O persoal de Limpezas Ames comezou o 8 de febreiro unha folga indefinida como protesta polo impagamento das dúas últimas mensualidades e pola escaseza de material para realizar o seu traballo en condicións.

Limpezas Ames é a empresa encargada do servizo de limpeza de diversos edificios municipais e de centros educativos da localidade. CIG-Servizos reclámalle ao Concello que rescinda canto antes a concesión, posto que a situación actual se repite periodicamente no tempo. Esta é a cuarta ocasión nos últimos dous anos que as traballadoras teñen que recorrer a medidas de presión para cobrar os seus salarios.

Despedidas 12 traballadoras da limpeza nun Alcampo vigués ao non seren subrogadas

05/2/10.

O cambio de contrata da limpeza nun Alcampo vigués supuxo o despedimento de 12 traballadoras que non foron subrogadas á empresa que se fixo cargo do servizo, “Amil Lago Servicios Generales S.L.”. Dita situación contravén o estipulado no Estatuto dos Traballadores e no convenio de aplicación, o de limpeza de edificios e locais da provincia de Pontevedra. O persoal estase a mobilizar para denunciar esta ilegalidade.

CIG-Servizos mobilízase contra o recorte horario na limpeza bancaria

19/1/10.

Ducias de delegados/as chegados desde diferentes comarcas do país mobilizáronse en Vigo o 18 de xaneiro onde protagonizaron protestas en sucursais de Caixanova e BBVA para censurar o recorte de horas aos traballadores/as da limpeza.

As accións consistiron en concentracións no exterior e ocupacións de oficinas. Representantes sindicais lograron entrevistarse cos directores das sucursais para lles trasladar as demandas dos empregados/as da limpeza, mulleres na súa maioría con contratos a tempo parcial.

As protestas da limpeza do CHUAC chegan até as portas do Centro de Especialidades do Ventorrillo

09/1/10.

As traballadoras e os traballadores do servizo de limpeza dos centros adscritos ao CHUAC continúan nestes primeiros días do ano co calendario de mobilizacións en demanda do cumprimento dos convenios colectivos e na defensa dos seus dereitos laborais. As protestas trasladáronse o 8 de xaneiro até o Centro de Especialidades do Ventorrillo.