Traballadores e traballadoras da Asociación DYA e de Serviasistencia, empresas concesionarias do servizo de axuda a domicilio do Concello de Ferrol, iniciaron mobilizacións o 10 de xuño na defensa dos seus postos e para demandar información sobre que compañías van ser as novas adxudicatarias.

Carlos Vázquez Castro foi elixido responsábel da CIG-Servizos de Ourense pola asemblea comarcal celebrada o 9 de xuño. No proceso só se presentou unha candidatura a cada un dos organismos federais e confederais. Vázquez Castro substitúe no cargo a Xosé Manuel Paradela Novoa.

CIG-Servizos conseguiu tres delegados no comité provincial de Supermercados DIA da Coruña nun proceso electoral que se estendeu durante un ano logo da repetición das votacións en tres ocasións como consecuencia das inxerencias da empresa. FETICO perdeu a hexemonía no órgano de representación dos traballadores pois, até a data, era o único sindicato con presenza no comité. A complicidade desta central coas represalias da compañía pasoulle factura e perdeu a confianza do persoal.

CIG-Servizos, malia ter asinado o preacordo, non rubricou finalmente o convenio do comercio de materiais de construción da provincia de Pontevedra como consecuencia da negativa da patronal ASEMACO e de CC.OO e UGT de redactar o texto en galego. Os empresarios e os sindicatos españois xustificaron o seu comportamento alegando que se trata “dun capricho da CIG”.

Medio cento de bombeiros e demais persoal de emerxencias deuse cita en Lugo o 20 de maio na manifestación en defensa da xestión pública deste servizo. Ao remate da marcha representantes sindicais entrevistáronse co presidente da Deputación, a quen instaron a manter o compromiso adquirido pola entidade que dirixe de que o futuro consorcio provincial sexa explotado directamente polas administracións públicas.

As asembleas comarcais da CIG-Servizos de Vigo e Ferrol celebradas en días pasados elixiron os e as representantes nos diferentes organismos federais e confederais. María do Tránsito Fernández repite como secretaria comarcal de Vigo e Cristina Martínez Ces é a nova responsábel da Federación na bisbarra ferrolá. En ambos procesos só concorreu unha candidatura.