Supermercados DIA ameaza con despedir traballadoras por ir nas listas da CIG

supermercados_dia_copia.jpg
Supermercados DIA está a exercer unha campaña incesante de acoso laboral, ameazas e persecución sindical contras as traballadoras que optaron por integrarse na candidatura da CIG. Un total de 16 empregadas presentaron a súa renuncia tras comprobar como os xefes as ameazaban con despedilas ou trasladalas de centro. Malia o acoso, a CIG conseguiu rexistrar unha candidatura para as eleccións do comité de empresa provincial da Coruña de Supermercados DIA.
19/6/09.

Diferentes mandos da empresa, moitos deles xefes de zona, ameazan sistematicamente as empregadas. En definitiva, advírtenas que, de non presentar a súa renuncia, se van “meter en problemas”.

Os niveis de intimidación da empresa non teñen límite. Responsábeis de Supermercados DIA ordenaron investigar a vida privada de candidatas e mesmo dos seus círculos familiares para comprobar se algún parente traballa en DIA e, por tanto, facer extensiva a represión sindical a eles.

A CIG-Servizos considera gravísimos estes feitos, que constitúen un caso flagrante de conculcación dos dereitos fundamentais das traballadoras e unha clara vulneración da liberdade sindical. A CIG-Servizos tamén quere censurar a complicidade amosada polo sindicato FETICO que, en todo momento, deu cobertura a represión da empresa contra as candidatas da central nacionalista.