Cortefiel despide dúas traballadoras con máis de 30 anos de antigüidade

Contra os despedimentos en Cortefiel 1 (20090717)
O Grupo Cortefiel, que tamén engloba as firmas SPRINGFIELD e WOMANS’ SECRET, prescindiu na Coruña de dúas traballadoras con máis de 30 anos de servizo alegando “baixa produtividade”. Mais detrás deste pretexto encóntrase a intención desta empresa téxtil de abaratar custes e fomentar a contratación eventual e a precariedade.
16/7/09.

Proba do anterior é que, aos dous días de producírense estes dous despedimentos, Cortefiel contou cos servizos de catro traballadoras novas con contratos eventuais a tempo parcial, o que supón un empeoramento global das condicións ao dispor de empregadas máis baratas para a compañía e con horarios máis flexíbeis.

Os propios responsábeis de Cortefiel recoñeceron aos representantes dos traballadores que o motivo real dos despedimentos é o abaratamento de custes. Isto demostra os poucos escrúpulos que ten a firma, que deixa na rúa dúas empregadas que construíron Cortefiel na cidade co seu esforzo e entrega durante máis de 30 anos, case desde os seus inicios. Así é como lles paga a empresa, despedíndoas miserabelmente a unha idade (57 e 50 anos) na que non se poden xubilar e na que dificilmente poderán atopar outro traballo.

A CIG-Servizos actuará con contundencia e non permitirá que este tipo de empresas traten os traballadores e traballadoras como mercadoría.