Iníciase unha campaña contra a modificación dos horarios en El Corte Inglés

CIG-Servizos iniciou unha campaña informativa entre as traballadoras e traballadores de “El Corte Inglés” para advertilos da posibilidade, máis que probábel, de que a empresa lles modifique os horarios coa plena conivencia de FETICO e FASGA, responsábeis da sinatura do convenio de Grandes Almacéns, recentemente rubricado e que supón unha clara regresión nas condicións salariais e sociais do persoal.

24/9/09.

CIG-Servizos recórdalles aos empregados que o cambio de horarios é unha modificación substancial de condicións de traballo que require, para a súa formalización, que o empresario e traballador estean de acordo. Trátase, ademais, dunha modificación colectiva que precisa da negociación cos comités de empresa. De todos os xeitos e se finalmente son impostos os cambios, cada traballador ten, a título individual, a opción de reclamar xudicialmente.

CIG-Servizos anima os traballadores a que se mobilicen para evitar a mingua dos seus dereitos. A central nacionalista tamén aporta outras respostas:

A recollida de sinaturas para forzar o comité a que non acepte a imposición da empresa. En caso contrario, forzar a revogación ou dimisión do mesmo.
Baixa inmediata como afiliado/a dos sindicatos da empresa.
Demandas individuais en masa contra a modificación de horarios (nos 20 días hábiles seguintes á modificación).

Adxúntanse panfleto e actas de reunións do Comité Intercentros coa empresa nas que figuran as modificacións dos horarios