FASGA e FETICO asinan a modificación de horarios en El Corte Inglés

O sindicato nacionalista informará do acontecido o persoal doutras empresas afectadas polo convenio de Grandes Almacéns (Alcampo, Carrefour e Leroy Merlin) en previsión de que nelas tamén se modifiquen os horarios. 

A pretensión empresarial de trocar os horarios é consecuencia do último convenio de Grandes Almacéns, asinado recentemente e que mingua considerabelmente as condicións laborais e salariais do persoal. Dito texto permite a posibilidade de realizar xornadas de 9 horas, ás que se engade outra de descanso que non computa como tempo traballado. Isto implica que os empregados poden estar 10 horas no centro de traballo.

Porén, o cambio de horarios aínda non entrou en vigor en El Corte Inglés xa que falta que o aproben os comités de cada centro de traballo. Resulta imprescindíbel que os empregados exhorten os seus representantes a que rexeiten esta modificación substancial das condicións de traballo. 

CIG-Servizos anima o persoal a que se mobilice para evitar a mingua dos seus dereitos. A central nacionalista tamén aporta outras respostas: 

• A recollida de sinaturas para forzar o comité a que non acepte a imposición da empresa. O comité podería interpor un conflito colectivo. En caso contrario, forzar a revogación ou dimisión do órgano de representación dos traballadores na empresa.
• Baixa inmediata como afiliado/a dos sindicatos da empresa.
• Demandas individuais en masa contra a modificación de horarios (nos 20 días hábiles seguintes á modificación).

Adxúntanse panfletos destinados aos traballadores de El Corte Inglés, Alcampo e Leroy Merlin, ademais das actas do Comité Intercentros de El Corte Inglés onde FETICO e FASGA avalaron o cambio de horarios.