Multiauto é condenada a readmitir os dous empregados despedidos por promoveren eleccións
Un xulgado compostelán ven de condenar Multiauto a readmitir dous traballadores que despedira no verán por promoveren eleccións nesta empresa dedicada ao transporte de automóbiles de alugueiro da compañía Leaseplan. A sentenza declara nulos os despedimentos ao se tratar dun caso de persecución sindical.
CIG-Servizos felicítase por esta resolución xudicial que avala a tese que sempre defendeu a central de que Multiauto represaliou os dous empregados pola súa acción sindical.
Porén, a loita para dignificar as condicións na compañía continúa. Os traballadores/as teñen que realizar xornadas excesivas, de 12 ou 14 horas continuadas, onde só paran para xantar, cos perigos que isto supón para a saúde e a seguridade nun traballo que require pasar tantas horas ao volante.
Multiauto Santiago tan só paga 10 euros en dietas aos traballadores/as por conduciren os automóbiles de Leaseplan dunha punta á outra do Estado.
O persoal, asemade, ten que ofrecer dispoñibilidade absoluta ao estar localizábel as 24 horas do día sen cobrar ningún plus por este concepto. Os empregados tampouco gozan do descanso mínimo semanal nin entre xornadas, co perigo que supón nun traballo destas características.
Novas relacionadas:
