Pimkie de Compostela despide a segunda traballadora nun ano

Pimkie.jpg
A multinacional francesa do téxtil Pimkie despediu unha traballadora do estabelecemento de Compostela, a segunda nun ano. Tal como acontecera no caso anterior, declarado improcedente pola Xustiza, a compañía tamén aduce agora “baixo rendemento” para lle rescindir o contrato á empregada. CIG-Servizos emprenderá accións.
03/12/09.

Pimkie botou a traballadora alegando novamente “baixo rendemento” e “faltas de respecto” á encargada da tenda. CIG-Servizos entende que este despedimento está relacionado coa presentación dun escrito ante a Inspección de Traballo denunciando as tentativas da encargada de lle modificar os horarios á empregada despedida. A responsábel da tenda compostelá, ao comprobar que non podía alterar as condicións laborais da compañeira, inflixiulle un trato ameazante e despectivo.

Mobbing á delegada de persoal

Pimkie tamén está a acentuar o acoso moral contra a delegada de persoal de Compostela, elixida pola CIG-Servizos. Este linchamento psicolóxico, urdido pola responsábel de zona, Natália Borges, e executado pola encargada de Compostela, consiste en desprezos, mentiras, difamacións e ameazas que a diario ten que soportar a representante das traballadoras.

Conculcación de dereitos

A responsábel de zona nega sistematicamente os días de asuntos propios, contravindo flagrantemente o convenio de comercio vario provincial. O texto estabelece que o persoal pode solicitar dous días de asuntos propios ao ano cando precise deles. Porén, Pimkie denega continuamente e de maneira arbitraria a concesión deste permiso retribuído argumentando falazmente que en determinadas épocas do ano non se pode solicitar, nomeadamente en decembro. Non obstante, a Inspección de Traballo recordoulle á compañía que este dereito lles asiste ás empregadas.

Por outra banda, as representantes das traballadoras pedíronlle explicacións a Pimkie polos erros detectados nas vidas laborais dalgunhas compañeiras polas que a empresa só cotiza media xornada pese a realizaren 30 horas semanais.

Máis información no blog das afiliadas da CIG-Servizos en Pimkie