Servizos confírmase como a Federación máis plural da CIG

Paulo Rubido pronuncia o discurso de clausura

A nova Executiva Federal da CIG-Servizos recibiu o apoio do 95% dos votos emitidos no V Congreso, celebrado en Compostela o 10 de abril. Este organismo experimentou unha renovación significativa coa incorporación de 6 novos membros. Paulo Rubido foi reelixido secretario nacional co 92% das papeletas emitidas. Servizos confírmase como a Federación máis plural da CIG e como a primeira en afiliados/as.

11/4/10.

CIG-Servizos incrementou nos últimos catro anos nun 30% a afiliación e o número de delegados/as.

O proceso de renovación dos organismos de dirección empezou pola propia Executiva Federal, que conta coa incorporación de seis novos compañeiros/as: Adolfo Naya Fernández, Asunción Castiñeira Fernández, Tomás Gonzalo Vaamonde, Cristina Martínez Padín, Xosé María Figueroa Trigo e Xosé Santiago Alvite Rueda.

O secretario nacional salientou que a confección da candidatura se fundamentou no consenso e incidiu no carácter plural da súa composición malia as “diferenzas lexítimas que poidan existir entre nós”. Rubido dedicou unha mención especial a catro compañeiros/as que non continúan na Executiva Federal: Carme Antas, Santiago Aldazábal, Xosé Lois Martín “Paio” e Lois Soto. A eles dedicou unhas sentidas palabras de agradecemento polo compromiso e entrega amosados durante moitos anos en defensa da clase traballadora.

O V Congreso aprobou as seguintes resolucións especiais: de apoio á Marcha Mundial das Mulleres, aos colectivos que loitan pola recuperación da Ría de Ferrol, á Plataforma para a Defensa da Sanidade Pública, sobre o excarceramento do sindicalista vasco Rafa Díez, en defensa do galego fronte aos ataques da Xunta, en contra da dispersión dos presos políticos galegos e a favor da súa liberación, na defensa dos servizos públicos, en contra da explotación dos traballadores/as inmigrantes, sobre a inclusión das empregadas do fogar no Réxime Xeral da Seguridade Social, de apoio á Revolución cubana, a favor do dereito de autodeterminación da Galiza e do resto dos pobos en especial do palestino, saharauí, vasco e catalán, en contra dos alimentos transxénicos, en rexeitamento da homofobia e a favor do recoñecemento dos dereitos das traballadoras do sexo e que estas se organicen na CIG-Servizos.

O V Congreso contou coa presenza de delegacións internacionais de ELA-Zerbitzuak, de Euskal Herria, e da Federació de Serveis da Intersindical-CSC, dos Països Catalans, representadas respectivamente por Igor Eizagirre, secretario xeral, e por Antoni Alarcón, secretario de Organización. A CGTP-IN portuguesa remitiu un comunicado ao Congreso e o sindicato vasco LAB escusou a súa ausencia por problemas de axenda. Pola súa banda, Suso Seixo representou a Confederación e Xesús Pastoriza a FGAMT-CIG.

RESULTADOS DAS VOTACIÓNS DOS DIFERENTES RELATORIOS E PARA A ELECCIÓN DOS ORGANISMOS: