Despedidas da limpeza do CPI de Panxón protestan na Consellaría de Educación

20100423_limpeza_cpi_panxon_consellaria.jpg
Varias ducias de sindicalistas da CIG-Servizos procedentes de Vigo, traballadores e as seis persoas despedidas do servizo de limpeza do CPI de Panxón concentráronse durante máis dunha hora na sede da Consellaría de Educación, en San Caetano, na mañá do 23 de abril. O sindicato esixe a implicación da Xunta para que procure unha solución a estes despedimentos. Porén, a Administración autonómica inhíbese de maneira irresponsábel.
23/4/10.

Estes seis traballadores e traballadoras perderon os seus postos o 1 de abril como consecuencia da decisión da Consellaría de Educación de que o persoal laboral do centro (camareiros-limpadores) asumise as funcións que realizaban. As empregadas e empregados afectados, que pertencían á compañía Limpiezas Germania, teñen idades comprendidas entre os 46 e 64 anos e catro deles acumulan unha antigüidade no centro superior aos 20. Tan só dous se poden acoller a unha prexubilación.

CIG-Servizos de Vigo considera que o traballo que realizaban os compañeiros despedidos segue a ser necesario tendo en conta a grande dimensión do centro, que dispón de dúas hectáreas de terreo, máis de 3.500 xanelas, comedor, polideportivo, entre outras dependencias.