Persoal do comercio téxtil pontevedrés volve a mobilizarse para acadar melloras

20100507_comercio_textil_vigo.jpg
Por volta dun centenar de empregadas e empregados do comercio téxtil da provincia de Pontevedra saíu novamente ás rúas viguesas o 7 de maio para demandar un convenio digno e con dereitos para o sector. A mobilización decorreu entre as rúas Príncipe, Urzáiz e Gran Vía.
10/5/10.

“Ortega chulazo, reparte con nós os cartos” e “Ortega nós tamén queremos ter un barco”, ambas en alusión ao dono de Inditex, foron as consignas máis proferidas no decurso da manifestación, que contou cunha participación maioritaria de traballadores e traballadoras deste grupo téxtil. De feito, a marcha detívose diante de cada un dos estabelecementos do emporio que atopaba ao seu paso. Cómpre lembrar que Inditex se nega a participar na negociación, malia posuír o maior número de estabelecementos no sector.

Reclamacións da parte social

Os sindicatos reclaman que os salarios das dependentas e dependentes, a categoría á que pertence a maioría do persoal, alcancen en dous anos os 1.000 euros. Na actualidade, están a percibir pouco máis de 800. Do mesmo xeito, a parte social demanda unha suba lineal para o resto de categorías.

Tamén se solicitan medidas que favorezan a conciliación da vida familiar e laboral e que os empregados e empregadas que prestan os seus servizos a tempo parcial teñan preferencia á hora de realizárense contratacións a tempo completo.