CIG-Servizos obtén maioría absoluta no comité coruñés de Pilsa

CIG-Servizos prosegue aumentando a súa representación nas eleccións de persoal como se demostrou nas votacións ao comité provincial coruñés de Pilsa, empresa de limpeza, onde conseguiu 8 delegados, fronte aos 3 obtidos pola UGT e aos 2 acadados por CC.OO.
14/5/10.

As eleccións celebradas nesta compañía o 12 de maio nos centros de traballo da provincia da Coruña poñen de manifesto, máis unha vez, a confianza que inspira nos empregados e empregadas o modelo sindical desenvolvido pola CIG-Servizos, baseado na participación, no asemblearismo e na combatividade.

Os presentes resultados representan un fito histórico en Pilsa pois a CIG-Servizos converteuse por primeira vez no sindicato maioritario na provincia da Coruña. A Federación quere felicitar especialmente os delegados e delegadas polo traballo sindical tan meritorio que realizaron nos últimos anos e os encoraxa a que sigan polo mesmo camiño a prol da defensa inquebrantábel dos intereses dos empregados e empregadas da compañía.