Iníciase en Lugo unha campaña de denuncia do acoso en Carrefour
A Federación de Servizos da CIG organizou o 19 de maio a primeira das concentracións de repulsa previstas contra a vaga de despedimentos de traballadoras no Carrefour de Lugo. A protesta realizouse diante do SMAC da cidade en coincidencia co primeiro acto de conciliación. As mobilizacións repetiranse diante deste organismo administrativo e tamén perante o propio hipermercado.
O secretario comarcal da Federación, Xosé Paz Fernández, expresa a súa preocupación polos tres despedimentos que esta multinacional francesa efectuou recentemente en Lugo: “Nesta empresa está sendo unha práctica habitual o despedimento de traballadores con certa antigüidade”. Acúsaa, ademais, de utilizar todo tipo de argucias para botaren os empregados, “mesmo empregando medios de dubidosa legalidade, como gravacións en vídeo”.
Por outra banda, os empregados e empregadas que traballan no Carrefour lugués temen que a sociedade prescinda de servizos que prestan compañías externas: “Agora mesmo xa se fala de rescindir o servizo de limpeza, do que actualmente é adxudicataria Serlimat Española”, circunstancia que provocaría a perda de moitos postos, segundo relata o secretario comarcal.
