Declaran improcedente o despedimento do operario de Geriatros que pedira unha adecuación de posto

Concentración Geriatros en Chantada 21-02-2011 4
O Xulgado do Social nº 2 de Lugo declarou improcedente o despedimento do traballador da residencia Geriatros de Chantada que pedira a adecuación do posto por mor dunha diminución de capacidade. A empresa ten a opción de readmitir o operario ou de indemnizalo con 51.047´92 euros. O fallo tamén obriga o xeriátrico a aboar os salarios de tramitación, aqueles que deixou de percibir o traballador desde o día do despedimento.
28/5/11.

Geriatros aducía causas obxectivas para lle rescindir o contrato ao operario, amparándose nun informe da mutua Fraternidad-Muprespa que non o considera apto para o traballo. Todo o contrario pensa o INSS, que rexeitou unha solicitude de invalidez porque entende que o empregado si reúne as condicións necesarias para desenvolver unha actividade laboral.

CIG-Servizos de Lugo manifesta a súa satisfacción pola sentenza e considera que se fixo xustiza. Tamén salienta a importancia das mobilizacións. “Vemos os froitos do traballo levado adiante na defensa do traballador dende a Asesoría Xurídica e tamén no calendario de mobilizacións que se levou adiante con concentracións na empresa, na Mutua e mesmo diante do Xulgado”, manifesta Xosé Paz, secretario comarcal da Federación.