A Xunta só conta cunha cuarta parte do operativo contra os lumes en plena temporada de risco
CIG-Servizos denuncia a falta de medios de prevención e extinción de lumes, unha carencia que se ve agudizada nestas datas nas que comeza a temporada de risco de incendios forestais. A Xunta tan só contratou algo máis dun milleiro de traballadores, o que representa unha cuarta parte do operativo de extinción. O sindicato e mailos comités provinciais anunciaron mobilizacións e mesmo a convocatoria dunha folga durante o verán.
Representantes dos traballadores e o secretario nacional da Federación, Paulo Rubido, reclaman que todos os servizos de prevención e extinción sexan públicos e estean unificados no Pladiga. Repróchanlle á Xunta que o operativo de extinción non vaia funcionar ao completo como mínimo até o 25 de xullo, malia a situación de risco extremo de incendios que atravesa o país. As brigadas helitransportadas non entrarán en funcionamento até o 5 de xullo, mentres que os grupos de a pé non se incorporarán até dous días máis tarde.
Rubido responsabiliza a Consellería de Medio Rural de converter en negocio todo o que rodea o lume, privatizando servizos como a Coordinación, os PMA (Postos de Mando avanzado), unidades móbiles e adxudicando a unha empresa privada, Natutecnia, as tarefas de coordinación da extinción ou os helicópteros a outras compañías.
CIG-Servizos aposta por unificar a prevención e extinción nun único dispositivo a través do Pladiga, a onde se incorporarían os traballadores da sociedade pública Seaga atendendo a criterios de antigüidade e por medio da modalidade contractual de fixo-descontinuos e sempre preservando o carácter público do servizo. En caso contrario, os operarios irán á folga “compaxinando o exercicio do seu lexítimo dereito á folga co respecto á seguridade deste país”, puntualizou Rubido. Neste sentido e sobre as consecuencias que se poidan derivar das mobilizacións asegurou que a responsabilidade “será sempre do conselleiro”.
Por último, o máximo responsábel da Federación realizou un chamamento aos traballadores do Pladiga para sumárense ás mobilizacións do persoal de Seaga, pois tamén están sendo vítimas dos recortes de Medio Rural.
Novas relacionadas:
