CIG-Servizos rexeita a supresión dos cursos de ximnasia e natación para os maiores vigueses

piscina.jpg
A Sección Sindical da CIG-Servizos nas piscinas municipais de Vigo emitiu un comunicado no que rexeita a supresión, a partir do 15 de outubro, dos cursos de natación e ximnasia destinados a maiores. Esta medida do Concello non só privará destas actividades a 400 persoas, senón que repercutirá de maneira negativa sobre os e as monitoras, que verán minguadas as horas de traballo e, por conseguinte, os salarios.
12/9/11.

O comunicado inquire o Goberno local a que explique por que motivo vai prescindir deste servizo concibido para mellorar a calidade de vida da xente de idade avanzada. A nota tamén lle reprocha ao Concello por que gardou silencio, máxime cando hai uns días se aprobaron os novos orzamentos.

A Sección Sindical solicitará reunións coa concelleira de Cultura, Festas e Políticas de Benestar, Isaura Abelairas, e coa dirección do Instituto Municipal dos Deportes, organismo encargado da xestión das piscinas e pavillóns municipais.

CIG-Servizos vai celebrar unha asemblea cos traballadores e traballadoras ao longo desta semana para informar da gravidade da situación.