Unha empresa da Deputación luguesa despide operarios por reclamaren dereitos

20110927_Seplusa_Deputacion_Lugo
A Sociedade Urbanística Provincial de Lugo, S.A. (SEPLUSA) despediu dous operarios que a demandaran porque lles pagaba de acordo cunha categoría inferior á que foran contratados. A represalia desta empresa, que depende da Deputación de Lugo, produciuse despois de que un xulgado estimase totalmente as pretensións destes traballadores. CIG-Servizos organizou un calendario de mobilizacións para denunciar este atropelo contra os dereitos da clase obreira. A primeira protesta desenvolveuse o 27 de setembro ás portas da entidade provincial.
28/9/11.

“É lamentábel que quen goberna a Deputación consinta despedimentos polo mero feito de reclamar dereitos laborais”, informa Xosé Paz, secretario comarcal da CIG-Servizos de Lugo. O sindicalista salienta que foi o propio presidente provincial, o “socialista” Juan Ramón Gómez Besteiro, o encargado de asinar as cartas de despedimento.    

A Federación levará adiante un calendario de protestas en solidariedade con estes dous compañeiros. As datas e lugares das mobilizacións concretaranse en función dos actos electorais dos partidos que sosteñen o Goberno provincial.

Fraude na cotización á Seguridade Social

SEPLUSA contratou estes operarios para desenvolveren tarefas de xardineiros mais estaban a cobrar segundo unha categoría inferior, a de axudantes de xardinaría.

CIG-Servizos puxo en coñecemento da Inspección de Traballo o feito de que SEPLUSA non estaba aplicando correctamente o convenio colectivo e de que cometía fraude nas cotizacións. O sindicato instou a Seguridade Social a que modificase as bases de cotizacións e liquidase as cotas dos últimos catro anos de todo o persoal. No seu informe, a Inspección constatou unha débeda de 25.000 euros, intereses de demora e propuxo unha sanción.