Un mando da Guardia Civil acosa un delegado por motivos ideolóxicos

20111107_picolo_acosa_afiliado
O sarxento da Guardia Civil do Aeroporto de Lavacolla está acosando un delegado da CIG-Servizos, vixilante de seguridade privada, por cuestións ideolóxicas, políticas e sindicais. Ademais, este mando do corpo militar español impídelle ao traballador o acceso á zona restrinxida do aeródromo, circunstancia que o obriga a prestar os seus servizos no aparcadoiro e nos exteriores. O sindicato organizou o 7 de novembro unha concentración nas propias instalacións aeroportuarias para esixir o cesamento do acoso ao traballador e o respecto aos seus dereitos fundamentais.
07/11/11.

O vixilante leva afiliado á central desde hai moito tempo e é unha das cabezas visíbeis do movemento sindical no sector. O compañeiro, por ser de esquerdas e nacionalista galego, está a sufrir o acoso constante do sarxento desde hai tres meses. Segundo Paulo Rubido, secretario nacional da CIG-Servizos, este mando da Guardia Civil “profesa unha ideoloxía de extrema dereita e non concibe que haxa traballadores que poidan ter unha ideoloxía diferente á súa”.

O militar español chegou a presionar a empresa do traballador para que o sancionase e mesmo realizou xestións ante a Delegación do Goberno do Estado para o inhabilitar no exercicio da súa profesión.

O sindicato aínda non recibiu da Delegación nin de Aena resposta algunha acerca deste caso de violación de dereitos fundamentais. “Son cómplices e colaboradores dunha situación que non é propia dos tempos nos que vivimos”, opina Rubido.

A CIG acordou iniciar unha campaña en defensa das liberdades ideolóxica e de expresión. “É inadmisíbel que, no século XXI, un sarxento da Guarda Civil, que pensa que está no ano 39, se dedique a perseguir, non só este traballador, senón outros máis de aquí do aeroporto”.