Sucédense os actos de apoio á traballadora dun Lidl ourensán vítima dun despedimento desproporcionado

20111115_lidl_ourense.jpg
Ducias de delegados e delegadas da CIG-Servizos concentráronse o 15 de novembro fronte aos centros de traballo Lidl en Ourense en protesta polo despedimento dunha traballadora, acusada de substraer unhas papas de cereal para a súa filla. O sindicato cualifica como inxusta, indecente e inmoral esta decisión empresarial, que ademais atenta contra a honorabilidade da empregada. As medidas de presión han continuar até que se alcance un acordo que dignifique a profesionalidade desta traballadora, que conta con máis de 10 anos de antigüidade na compañía.
15/11/11.

Lidl acusa a empregada de coller unhas papas de cereais para bebés a última hora da tarde cando a caixa xa estaba pechada, circunstancia que lle impediu pagar o artigo, valorado en 2´90 euros. “A intención da traballadora era abonar esa cantidade ao día seguinte ao comezar a xornada laboral”, explican desde a CIG-Servizos ourensá. Tampouco se tiveron en conta as alegacións expostas pola empregada, que fora advertida pola súa nai de que necesitaba a papa para darlles de cear ás fillas.

O sindicato considera que Lidl aproveitou esta situación para desfacerse dunha traballadora fixa que ao longo de 10 anos demostrou unha profesionalidade e entrega totais ao seu traballo. “A pesar dos nosos intentos por intentar chegar a acordos coa empresa, a negativa da mesma ao diálogo fixo imposíbel atopar unha solución”.