O Supremo abre a porta a que o persoal de SEAGA pase a formar parte do PLADIGA

Asemblea e manifestación de SEAGA 8
Varias sentenzas do Tribunal Supremo recoñecen que a contratación en SEAGA é fraudulenta por apostar pola modalidade de obra e servizo no canto de que os traballadores sexan fixos-descontinuos. Ademais, o Alto Tribunal español ofrece a posibilidade de que os 2.000 empregados de SEAGA reclamen por cesión ilegal para pasar a formar parte do PLADIGA (Plan de Prevención e Defensa contra os Incendios Forestais de Galicia), que está conformado por persoal laboral da Xunta.
14/12/11.

CIG-Servizos intentou sen éxito iniciar un proceso negociador para evitar a vía xudicial e que SEAGA, empresa de capital público, teña que desembolsar 1.200.000 euros en concepto de indemnizacións por resolucións improcedentes de contratos. Mentres, no prazo dun mes, presentáronse máis de 200 demandas por despedimento que se ventilarán en xuízos a partir do mes de xaneiro de 2012.

Paulo Rubido, secretario nacional da CIG-Servizos, repróchalle á Xunta que, en troques de intentar resolver unha situación ilegal, “tire para adiante e dilapide 1.200.000 euros nunha acción absolutamente inútil que non reporta absolutamente nada”. En todo caso, Rubido matiza que o propósito do persoal de SEAGA non son as contías das indemnizacións, senón unhas condicións laborais dignas.