As empregadas de Serviasistencia levan tres meses sen cobrar

dya_serviasistencia_ferrol.jpg
As traballadoras de Serviasistencia, unha das compañías encargadas do servizo de axuda a domicilio no Concello de Ferrol, levan máis de tres meses sen cobrar os seus salarios. Ademais, a empresa non respecta o descanso legal e non lles paga a nocturnidade nin as horas extraordinarias, aspectos todos eles contemplados no convenio e cuxo incumprimento xa foi denunciado en reiteradas ocasións pola CIG-Servizos.
09/1/12.

Serviasistencia non lles paga os salarios ás traballadoras desde hai máis de tres meses. Tampouco se lles abona o plus de nocturnidade nin o total da quilometraxe. Á parte de non respectar o descanso mínimo semanal de día e medio, obrígaas a realizaren horas extraordinarias, que logo non as retribúe. Estas irregularidades provocan que o persoal teña que desenvolver o seu traballo en condicións precarias e con cansazo acumulado. A empresa, asemade, tampouco cobre as baixas.

Esta situación ten ocasionado que as traballadoras fosen abandonando pouco a pouco a empresa, polo que o cadro de persoal muda constantemente, o que provoca un grave deterioro na calidade do servizo.

CIG-Servizos de Ferrol critica a actitude do Concello pois ignora as reivindicacións do persoal de Serviasistencia. O Goberno municipal alega que a empresa é solvente e que non poden facer nada. Non obstante, é coñecedor de que os usuarios están a mudarse a outras empresas para recibir o servizo de axuda a domicilio.