Continúa o peche na Torre de Hércules malia acabárense os alimentos
Os dous sindicalistas que desde o 11 de xaneiro permanecen pechados no eirado da Torre de Hércules, a máis de 60 metros de altura, continúan adiante con esta medida de protesta pese a que xa non dispoñen de alimentos. De momento aínda lles quedan líquidos para inxerir. Mentres, segue incrementándose o apoio popular ao persoal do faro e aos activistas encerrados. Organizacións políticas, veciñais e colectivos sociais manifestan a súa solidariedade coa loita e animan a participar na concentración do día 15.
Adolfo Naya e Alejandro Expósito (UGT) quedaron sen alimentos na mañá do 13 de xaneiro, terceiro día de encerro. Os sindicalistas están a soportar estoicamente unhas condicións meteorolóxicas moi adversas, con fortes rachas de vento, un índice elevado de humidade e temperaturas moi frías que polas noites poden baixar dos cero graos.
Ánimo elevado
A decisión de seguir co peche adoptárona o día 12 despois de recibiren informacións que cuestionan as manifestacións da concelleira de Turismo sobre os motivos da clausura da Torre. As obras previstas non comezarán até dentro dunhas semanas e limitaranse a pequenas actuacións no monumento, que mesmo poderían realizarse sen necesidade de pechar o faro.
“Estas noticias confirman as nosas sospeitas sobre que as supostas obras non son máis que unha escusa para botar os 13 empregados e empregadas da Torre”, informa Naya.
