Novas accións de protesta en establecementos de alimentación e téxtil polo bloqueo dos convenios

Traballadores/as do sector e delegados/as da CIG volveron colapsar varias tendas para denunciar a actitude da patronal
Delegados/as sindicais e traballadores/as do comercio de alimentación da CIG de Pontevedra desenvolveron hoxe novas accións de protesta para reclamar o desbloqueo das negociacións do convenio colectivo. A mobilización, que ao igual que as levadas a cabo anteriormente en tendas de roupa noutros puntos do país consistiu en coller dos estantes gran cantidade de produtos para unha vez na caixa devolvelos, colapsou durante máis dunha hora un supermercado do centro da cidade. No caso de Ourense a protesta desenvolveuse o xoves nunha tenda de roupa do centro comercial Pontevella.
21/12/12.

Dende a federación de Servizos de Pontevedra explicaron que a iniciativa forma parte da campaña iniciada recentemente a nivel nacional para presionar á patronal coa fin de desbloquear as negociacións dos convenios de comercio vario, comercio alimentación, téxtil e hostalería.

Nesta ocasión o establecemento escollido foi un supermercado Gadis da rúa Benito Corbal, onde se formaron grandes colas e moitos clientes marcharon sen mercar ante o colapso nas caixas, tal e como sucedeu esta semana en Vigo.

No caso de Ourense a protesta desenvolveuse o xoves no centro comercial Pontevella. Un grupo de traballadores/as e delegados/as sindicais de CIG, CCOO e UGT do sector do comercio téxtil concentrouse ás portas establecemento mentres outros/as compañeiros/as colapsaban a tenda MISS-TIC.

Dende a federación de Servizos explican que se trata dun negocio “pertencente á cabeza visíbel dos empresarios do comercio téxtil de Ourense na mesa de negociación”. Finalmente, lembran que os contactos están suspendidos “pola intransixencia da patronal co apoio da Confederación de Empresarios de Ourense”.