Amplo seguimento da folga na alimentación en Pontevedra mentres segue a mediación en Traballo

As negociacións atópanse enquistadas pola negativa da patronal a ceder no referente á antigüidade e ao salario
A folga convocada no comercio de alimentación da provincia de Pontevedra para reclamar un convenio que garanta os dereitos laborais está a ter un amplo seguimento por parte dos traballadores/as. Centos de piquetes informativos percorreron dende primeira hora da mañá as rúas de Vigo, Pontevedra e Vilagarcía para constatar que a maior parte dos establecementos non abriu as súas portas. As negociacións entre patronal e sindicatos na Inspección de Traballo continuaron nesta primeira xornada de paro.
25/3/13.

Galería de imaxes

A mediación na autoridade laboral retomouse este luns ás 10.00 despois dun intenso fin de semana de negociacións que non serviu para lograr un acordo que permitise desconvocar a folga no sector.

Segundo explicaron dende a federación de Servizos da CIG, as posturas atópanse moi distantes porque a patronal insiste en recortar en materia de antigüidade e oponse ao pequeno incremento salarial que reclaman os traballadores/as.

Diante disto, os afectados/as manteñen a convocatoria de folga prevista para toda a semana e que está a ter este luns a súa primeira xornada. Dende as centrais convocantes valoran moi positivamente a incidencia dun paro ao que estaban chamados/as uns 15.000 empregados/as.

As principais cadeas de alimentación de Vigo, Pontevedra e Vilagarcía non abriron as súas portas, excepto as que teñen convenio propoio como Mercadona, Eroski ou Día, Mercadona e os grandes almacéns como Alcampo ou Carrefour.

Centos de piquetes percorreron as rúas dende primeira hora da mañá e durante boa parte da xornada, aínda que o seu labor informativo limitouse a algúns pequenos establecementos que non tiñan claro se finalmente se chegara a un acordo e se desconvocara a folga. No caso de Pontevedra, impediron a saída de camións do almacén de Froiz en Poio.