A CIG-Ensino considera que a información sobre a xestión das actuacións no CIFP Manuel Antonio “non foi nada eficaz por parte da Consellaría” e insta a que se emende esta falta de comunicación “e se traslade a partir de agora toda a información sobre este tema para que chegue de forma clara e directa ao profesorado do centro”.

Representantes do sindicato xa advertiran da mala planificación sobre as datas de comezo das obras nun centro destas dimensións e a dificultade que ten compatibilizalas coa vida académica. En varias visitas feitas ás instalacións desde comezos de curso, a CIG fíxose eco do malestar do profesorado pola falta de medidas de prevención e de protección da saúde e da seguridade de toda a comunidade educativa, con exposición a produtos químicos e tóxicos, especialmente lesivos para certos colectivos como poden ser mulleres embarazas.

Así mesmo producíronse caídas de obxectos con evidente risco para a integridade física de profesorado e alumnado que foron postos en coñecemento da administración sen que esta tomara medidas efectivas até o momento.

Despois de que o profesorado do centro presentara queixas por rexistro, se manifestara durante as folgas convocadas este curso ante a situación que padecían, e se realizaran concentracións por parte do alumnado diante do instituto, esta mañá citouse a un docente ante a xefatura de inspección de Pontevedra para pedirlle explicacións sobre a súa implicación nas mobilizacións do alumnado.

Desde a CIG-Ensino apélase a que se resolvan as dificultades técnicas das obras coa menor incidencia posíbel para alumnado e profesorado sen que este último se sinta presionado por exercer o seu lexítimo dereito á protesta.